ГӏалгӀайчен искусствон ишколе терроризмах бейнараш дагабехар
ГӏалгӀайчен искусствон колледже дӀайихьар белгаларча лосчтамах йола урок-лекци, из хетаяь яр, терроризмаца къовсам лоаттабе барт баь Ди белгалдеш. Из дагалоаттама Ди белгалдир вай мехка, цо юха а дагайохийтар уж хала ханаш, вай мехка исторен оагӀон тӀа йицлургйоацаш йиса. Хьехархоша, студенташа терроризмах бейнарий сий дир.
«Колледжа хьехархочо Чопанаькъан Мадинас студенташца кӀоарга чулоацам болаш кхетаче дӀайихьар. Лекци дӀахьош терроризмаца дувзаденна керттера хаттараш дийцар: дӀаяхача ханашка хинначунгара таханарча дийнахьа латтача хаттарашка кхоачаш. Керттера терко тӀайохийт терроризмаца Россе санна дерригача дунен тӀа къовсам лоаттабара. Кхетаче дӀахьош студенташта дайзар терроризмах бейнарий денал, иштта экстремизма духьалъоттара юкъарлоно дакъа лаца дезарах», - аьлар «Сердало» газетага цу дешара моттиге.
Студенташа цӀенхаштта ладийгӀар лекцега, дика дакъа лаьцар цу юкъе шоашта хетар хоатташ, тохкаш. Цар денна хаттараш дукхагӀча даькъе дувзаденна дар барт, цхьоагӀо хиларца, юкъарлон вахар кхераме хургдоацаш де дезар малагӀа да.
Кхетачен чудоагӀаш дар терроризмах лаьца долча документальни, художественни фильмашка хьажар. Кино гойташ хиларо дикагӀа из хьал довза таро лора. Цига кхетаде йиш яр, мел чӀоагӀа сакхетам болаш хила веза цу бӀехача гӀозарах дӀа ца кхета; иштта, бехктокхам кхетабеш, нийса вахар дӀадахьа.
ГӏалгӀайчен искусствон колледже лаьрхӀад, цу тайпара кхетаченаш лоархӀаме дакъа дӀалоацаш я къонача ноахала де дезар хьалхадоаккхаш, цар новкъостал ду барт, цхьоагӀо леладе юкъарлонна юкъе, из лоархӀаме да экстремизма, терроризма духьалъоттара.
