«Аьрзи» лагере хьайийллар, «Хьалхарчар ха» яхача лостамагӀа йола смена
ГӏалгӀайчен дика йовзаш йолча «Аьрзи» оалача берий лагере укх шера хьалхара хьайийллар хьинар дарий смена - «Хьалхарчар ха», аьлар «Сердало» газетага ГӏалгӀай Республике гӀолла волча «Хьалхарчар болама» бувзамий говзанчас Налганаькъан Рамзана.
«Кхетаче дӀайолайир «Хьалхарчар болама» моттигерча даькъа Кхела кулгалхочун Албохчанаькъан Маринай кхайкаралца. Цо дешархошта баркал аьлар цу тайпара йолча кхетачене дакъа лацарах, шин кӀира шуга хьежаш я дика спортивни а, салоӀама а ха, яхаш, дийцар цо. Цул тӀехьагӀа массаза санна къонача юкъарлонхоша къаман халхар дӀадоладир, шатлакхаш а яр цу юкъе», - аьлар хоамо.
Тхоца къамаьл даьчо яхачох, цар Хьалхарчарна экскурси кийчйир Ӏалама хозача моттигашка гӀолла, говзанч-хьехамаш делар, ловзараш дӀадихьар, тоабаша шоайла дикагӀа кхеташ болх бергболаш.
