Оакхарий, оалхазараш лоархӀа болх дӀахохьош ба
11.02.2025 12:57
ХӀара шера, Ӏан шоллагӀча бетта 15-ча денгара бӀаьстан хьалхарча бетта 15-ча денга кхаччалца, хьунашкара оалхазараш, оакхарий мел да тохкаш болх дӀакхухь мехка. 109 хьун наькъ тӀа гӀолла го баккха безаш ба укх шера хьун тӀахьожам лоаттабераш.
Оакхараша лай тӀа йитача ларашка хьожаш, дӀакхухь из болх, иштта хьунашка лелача дийнаташта ялат дехк цар. Оалхазарашца а дӀакхухь иштта бола болх. Хьун тӀахьожам бераша белгалдечох, цу гӀулакхо царна тӀахьожам лоаттабайт, оалхазараш, оакхарий хӀара шера мел деб хьахьокх.
