140 эзар сом ахча даар тIатетташ да Магасерча хьакима
20.05.2025 10:52
Республикерча паччахьалкхен архива оагIонцарча болхлочоа тIатетт бокъо йоаца хIама чакхдаккхар. Из хоам «Сердалога» бир Iаьдала болхлоша. Тохкама болхлоша гучадаьккхачох, 2023-ча шера Iан тIехьарча беттагара 2024-ча шера бIаьстан тIехьарча беттага кхаччалца 140 эзар сом Iаьдала ахча диад цу сага.
Цу моттиге вIалла болх беш ца хиннача, машинаца болхлой дIа-хьа кхувлача сага цIерах латташ хиннад ахча. Белгалде деза, хьалхагIа, доккхача ахчанца цу сага кхаа эцарах дегабуам беш хиннилга.
Уж шаккха гIулакх вIаший хетта, тохкама болх дIахьош да Iаьдал. Цу сага духьала гIулакх хьаделлар республикерча МВД экономикацарча кхерамзленахи, кхааш ийдара духьала къовсам лоаттабарахи болча оагIонгара кхаьчача каьхаташа чIоагIдеш да.
