Тахан вахаре нийслуча кхерамеча хӀамаех, дийцар Магасерча берашка
Магасерча администраце терко ярах, тӀахьожам лоаттабарах болча оагӀон болхлоша, терроризма духьаларча комиссе берашца, цар даьшца-ноаношца кхетаче йир. Царна хьалхадаьккхар, тахан вахаре геттара чӀоагӀа лоравала, фийла хила везараш. «Сердалога» из хоам шахьара мэре бир.
Кхетаче дӀадийкъар 18 шерга кхачанза бараш бокъонаш телхаярах бехктокхаме озаш хиларах дувца каьхаташ. Иштта терроризм, экстремизм яхача доккхача зуламех, наькъашкара бокъонаш цалархӀарах дийцар цига.
Нах гуллуча моттигашка боккхийбараш уллув боацаш хила йиш яц берий, хӀана аьлча воккхагӀа саг тӀахьожаш ца хилча бераша, кагирхоша бокъонаш толхаеш нийслу. Даьшта, ноаношта хьалхадаьккхар, лораде дезараш массахана берашка дӀадувца, аьнна.
Иштта йола кхетаченаш дукха нах бахаш, болх беш, дешаш болча Магасера кхерамзлен оагӀонцара хьал тоадара тӀехьа дӀакхухьаш я.
