«Турпалхочун парта» хьаеллар хетадаь дар денал долча гӀалгӀай къаман воӀа, Россе Турпалхочунна Боканаькъан Къурейша Мустафайна. Из цӀаккха а вицлургвоацаш, наьха дегашка висар; ший мохк, Даьхе бахьан долаш са Ӏодилларах. Кхетаче дакъа лоацаш бар хӀарман викалаш, депутаташ, юкъарлонна болхлой, дешархой, цар хьехамчаш», - аьлар хоамо.

Дешархой а хьехархой а дакъа лоацаш хилар цу Ерригроссе цӀихезача проекта юкъе. «Турпалхочун, парта» - из да дешархочун сурташ, Турпалхочох бола хоам тӀабола истол, цу тӀа бувц цун тӀема никъ, карагӀдаьннар, цун денал. Цу парта тӀа багӀа бокъо йолаш ба дикагӀа дешаш бола йиӀигаш, кӀаьнкаш, бехктокхаме шоай дешар дӀахьош бараш.

Денал долча Даьхен бӀухошта карагӀдаьннар дайзачул тӀехьагӀа, хӀара сага корадергда масал эца мегаргдола гӀулакх.

Боканаькъан Къурейша Мустафа ваьв 1986 шера, маьцхали бетта 23-ча дийнахьа Нохч-ГӀалгӀай АССРа МагӀалбика кхален СоагӀапча. 2003 шера цо йоаккх СоагӀапчара юкъера ишкол. 2007 шера Москвера лакхара юкъарча бӀуна тӀема-командни училище йоаккх. Амал деш хул из дивизен 58 эскара 42-ча гвардейски мотострелкови дивизен 71-ча гвардейски мотострелкови полке, юххьанца мотострелкови взвода командир волаш, цул тӀехьагӀа батальона командирага кхоачаш лакхву из.

2022 шера саькура бетта 24-ча дийнахьа денз, ЛаьрххӀача операце дакъа лоацаш вар из. Шийна хьалхашка латта декхар кхоачашдеш, 2023 шера маьтсела бетта 15-ча дийнахьа валар хилар цун, бувцача тӀем тӀа яьча човнах. Из дӀавеллав ше ваьча СоагӀапча.

Подполковника сий долаш кхоачашдир шийна тӀадилла тӀема декхар, маьрша нах кӀалхарбахарах «Майрал гойтарах» яха майдилг елар цунна.

Тахан ГӀалгӀайчен бахархоша доаккхал ду, цу тайпарча нахах, Россена мутӀахьа болаш; денал, майрал гойташ; вай мехка бокъонаш лораеш, вай кхоане сийрдагӀа хилийта гӀерташ, моастагӀчоа духьаллатташ хиларах.