Магасе хургья, пескашца бургацах ловзара яхьаш
03.04.2025 16:51
ХьатӀадоагӀача шоатта дийнахьа, Индера хьабаьхкача студенташа дакъа лоацаргда крикет яхача ловзарах йолча тоабай яхьашка. Сийрда кхетаче дӀахьоргья Магас-Шахьара Пхьарчанаькъан Мухьмада цӀерагӀча стадионе.
«Из дика ловзар дӀахьош да Магас-Шахьара культуран, спорта, туризма Центро, ГӏалгӀайчен паччахьалкхен университето, студентий спортивни клубо хьаллоацаш. Из болх вӀашагӀбеллараша цу ловзарах йолча яхьел совгӀа, кхыйола яхьаш а дӀаяхьа лерхӀ, физически культура дегӀайоалае дагахьа. Инде викалий таро хургья шоай говзал гойта», - аьлар хоамо.
Яхьаш дӀайолалургья Ӏуйрийна 10 сахьат даьлча.
