Рамадан - КъорӀа дешара бутт. Къаьстта Рамадан бетта, дин дийшача наха яхачох, Доссадаьд КъорӀа. Иштта дийшача наха яхачох, эггара дикагӀа АллахӀа мутӀахьа волча сага дергдар да, шийна тӀадилла пхи параз кхоачашдаьчул тӀехьагӀа – АллахӀа деза Китаб дешар. Цудухьа укх езача хана, Магасе дӀайихьар КъорӀа дешара яхь, цига дакъа лоацаш хилар 25 мутаӀалам.

Яхь хьаеллаш, Магаса имама Мержой Адама белгалдир, КъорӀа дешаш хилар АллахӀа корта тохаш хиларал совгӀа, вахара никъ дӀабахьара кулгал да, аьнна.

Яхь дӀахьош, дина викалашта новкъостал дир шахьара мэра декхараш кхоачашдеш волча Тиймарзанаькъан Мусас.

«Укх безача мархий бетта КъорӀа дешара яхь дӀаяхьар дин чӀоагӀа хилар а цун мутӀахьа хилар а да. Вай хьужаре деша дагӀа бераш хьаллоацаш хуле, вай таро хургья цӀена дин дола тӀехье хьалкхее. Аьттув хилба берий яхье санна шоай вахаре а», - аьлар Тиймарзанаькъан Мусас, ше берашта ловца боаккхаш.

КъорӀа дикагӀа дийшачоа дала оттадаь хинна 50 000 сома сертификат кхаьчар Магас-Шахьара кулгалхочунгара Беканаькъан СайфулахӀа. ШоллагӀа моттиг 30 000 сома сертификат кхаьчар Сурхой Юсуфа. КхоалагӀа моттиг - Сурхой СаӀида, цунна делар 20 000 сом ахча.

Моттигаш яьхараш а, беррига доакъашхой а безбир совгӀаташца.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде