Магасе «Гӏордадега каьхат яздар» яха болам дӀаболабир
№ 386001 йолча Россе почтан профсоюза болхлоша, Магасе «Гӏордадега каьхат яздар» яха болам дӀаболабир, яхаш, дийцар «Сердало» газетага ГӏалгӀай республикан почтай бувзама Федеральни гӏулакха тӏарча наха.
«Из ди белгалдаьлар дукхача дикача моттигашца. Магас -Шахьара дешара Центрерча бераша, почта бувзама болхлой бераша кичйир керттерча кердача шера турпалхочун байташ. Из кхетаче чакхйоалаш, дерригача берашта мерзача даарий совгӀаташ делар почта викалаша», - аьлар хоамо.
«Цу тайпара болам геттара лоархӀаме ба Россе почтанна, каьхаташ яздарцара берий безам совбаккха, из гӀулакх дезадолийт тайп-тайпарча оамалашца. Тхо раьза да берашта кердача шера фаьлгаш дала, иштта царца каьхаташ яздара гӏулакх хьаллаца. Баркал массанена, цига дакъа лаьцарашта», - аьлар ГӏалгӀайчен УФПС кулгалхочо Гаьгенаькъан Ислама.
