«РГО 17-ча съезда доакъашхой хоржаш дӀабахьа безача балхах дийцар кхетаче дӀайолаеш, иштта РГО 180 шу дизара хетаяь кхетачеш дӀаяхарах хьоахадир гулбеннараша», - йоах тхога бенача хоамо.

ГӀалгӀайчен моттигашка «Берашта географи», «Географически диктант», «РГО хьасташ», «Юха хьаелл вай Росси. Цхьана», «Классера географи» яха проекташ йоаржае езилга теркалдир вӀашагӀкхетаре.

ГӀалгӀай паччахьалкхен университета кулгалхо, иштта моттигерча РГО кулгалхо йолча Ӏалбаканаькъан Фатимас теркалдир, «Эггара хозагӀа бола мохк», «ТолашагӀа вола гид» яха яхьаш вай кагирхошта чӀоагӀа езаеннарех йолга.

Зале йийшар Ӏилман-методически балхах йола Долов Микаила, Йовлой Маринай РГО доакъашхоех, иштта паччахьалкхен моттигашца бувзам болаш дӀахьоча балхах йола, эрсий географически оагӀон 180 шу дизара хетаяьча кхетаченех йола Дошлакъанаькъан Залинай, кагирхой моттиг хьаелларах дувцаш йола Овшанаькъан Ӏайнай докладаш.

ВӀашагӀкхетаре соцам бир, кхаленашка, юрташка, шахьарашка РГО моттигаш хьаелла. Моттигерча оагӀон болх дикагӀа дӀагӀоргболаш; проекташ, яхьаш, диктанташ доаржадара тӀехьа лоархӀаме да къаьста из гӀулакх.