Зуламхоша шоай лар йитай, Магасерча наха салоӀача моттиге
29.07.2024 09:42
Алане доазон тӀа дер дайна лелача зуламхоша йита лараш дӀайоахаш хилар, Магасерча ЖКХ къахьегамхой. Из хоам «Сердалога» бир шахьара администрацера.
«Фонараш йохаяь, куцала дегӀа бӀоагӀий соттадаь, гӀандаш дохадаь бахаб эхьи юхьи доаца дер дайна лела зуламхой…
Бахархошка кхайкарал ду! Боккъал а хам бе шоашта лаьрхӀа тоадаь латтача хӀаман! Лораде дукха къахьийга хьакхеллар. Ма хила шоай къаман моастагӀий!» - йоах мэре викалаша, салаӀа арабувлача нахага.
Алане доазув, хьатӀабаьхка хьаьший салаӀа сувцаш, дукха нах тӀалатташ моттиг я. МоллагӀча, лерттӀа волча сага бӀарг хьоасташ да цигара сурт. Дукха рузкъа дӀатӀадохийташ, тоаяь латта моттигаш толхаеш леларашта фуннагӀа даь хьалохаш, гӀод тоха деза, доагӀаш дола таӀазар дӀадала деза!
