1944 шера гӀалгӀай къам мехкахдаккхара хетаяь суртий яхь хилар Магасе
Магас-Шахьара культуран, спорта, туризма Центре суртий яхь дӀайихьар,1944 шера къам мехкахдаккхарах дувцаш йола. Кхетаче дӀахьош къаьгга шоай уйлаш гойташ дола сурташ дехкар Магас-Шахьара №2 йолча юкъерча ишкола, «Лицея-берий беша» дешара Центра бераша, яхаш, дийцар «Сердало» газетага из кийчъяьраша.
«Дерригаш а дӀалаьрхӀача 25 бер дар кхоллама балха юкъе дакъа лоацаш; ГӀазакхстана, Юкъерча Азе гӀалгӀай къам Ӏодахьийтара дагалоаттама хетаяьча кхетаче дена. Жюре болх дӀахьош бар Магаса, Наьсарен тайп-тайпарча ишколай исбахьален искусствай хьехархой. Шоай художественни дагалоаттама сурташ тӀа бераша юкъедоаладир боккхагӀчар дийцачох дола доакъош», - йоах хоамо.
Кхетачен чаккхе еш, котъяьннарех лаьрхӀар Магас-Шахьара №2 йолча юкъерча ишкола дешархо Вешкаранаькъан Салима. ШоллагӀа моттиг яьккхар дешара Центрерча Озанаькъан Джамиляс. КхоалагӀа моттиг «Лицея-берий беша» дешархочунга Муцолганаькъан Ясминайгеи дешара Центра викал йолча Тӏумхой Аминайгеи кхаьчар.
«Цу хана денз, 81 шу дӀадахад, диълагӀа ноахал хьалкхувш доагӀа. ГӏалгӀай Республика яхаш я Россе дукхача къамашта чуйоагӀаш.
Вай даха гӀерт диканна тӀехьа, кхебу дезал, царна гойт вай цаӀаш хилар, барт хилар, бахьан долаш цу халача ханашка ца дохаш юха мехка даьннилга. Из дар вай Даьхе, мохк безаш хилар, цудухьа вай чӀоагӀа хиларо юха мехка а даьхар вай», - аьлар ЦКСиТ кулгалхочун гӀончас Янданаькъан Абте.
