Магасе лекци йийшар, «Камерца дӀаяздара балха кердадар» яхача темах
Магасе дӀайихьар, дукхача къамий меттала болх беш йолча RT (Росси тахан) яхача халкъашта юкъерча телеканала Медиаишкола чуйоагӀаш, «Протокола сурташца керда хьажар» яха лекци. Телевизионни журналистски комитета операторий отдела кулгалхочунца Силяев Викторца дӀайихьача хано таро хилийтар мехка СМИ камерца болх беш йолчара кердадараш довза, яхаш, дийцар «Сердало» газетага цу моттиге.
Из тема чӀоагӀа терко тӀайодаш яр, хӀана аьлча тахан видео-материал журналистике керттера моттиг дӀалоацаш я.
Гулбеннараша дийцар камера тӀара сурт хозагӀча тайпара даккхара хьалхарча аргӀагӀа ха дезар фуд. Сурташ къегаш хургдоацаш, нийса, дика гуш хургдолаш хьалхардар а тӀехьардар а шоай моттиге латташ хургдолаш камерца бе беза болх хьалхабаьккхар.
Говзанчас белгалдаьккхар камера - из сага бӀарга тара я, бакъда цунна санна дика гуш хилац доаккхаш дола сурт, цудухьа цкъа хьалхагӀа камерца болх бе беза, из ший наькъ тӀа яккхара. Сихал, сийрдал,чулоацам, кхыйола моттигаш йовзаш хила еза оператора. Секунда бӀарчча 25-30 сурт хила деза, тӀаккха из сурт дӀаязду.
«Уж вӀашагӀхеттача мугӀар тӀа хила деза лоархӀамегӀдар. Къаьстта цунна терко тӀайохийт хьожаш волчо хьалхарча аргӀагӀа», - аьлар Силяев Виктора.
