Магасе «Кердача шера чоалпингаш» яха гойтам хилар берашта лаьрхӀа
ГӏалгӀайчен столицерча Йовлой Берда цӀерагӀча спорта ЦӏагӀа «Кердача шера чоалпингаш» яха йоккха кхетаче хилар. Из цӀай бокъонца дола совгӀат дар, республикан зӀамигача бахархошта. Цига дар дукхача миӏингашкара 3000 бер. Кхетаче вӀашагӀъеллараша, шоашкара йӀовхал езача берашта дикка терко йир. Царна юкъе дар ЛаьрххӀача операце бӀухой а, иштта могашал эшаенна, таро йоацача фусамашкара а бераш.
«Цӏайна лаьрхӀа йола программа вӀашагӀъеллар ГӏалгӀайчен культуран, туризма Министерствос, иштта Хамхой А. цӀерагӀча Паччахьалкхен филармоне. Театра гойтамаш юкъе а долаш, кийчъяьча программага хьожаш чӀоагӀа самукъадаьлар берий а, иштта царца хиннача боккхагӏчар а.
Сцена тӀа баьлар республикан ашарий ишкола дешархой, цар хоза совгӀаташ кийчдаьдар гулбеннарашта, уж хозаш дар иллешца, халхарашца. ГӏалгӀай Республикан Кулгалхочо хӀара бера дайтар мерзача даарий совгӀаташ.
«Кердача шера чоалпингаш» яха, цӏай юха а де лаьрхӏад кхоана,берашта кхы а дукхагӀа хозал гойта, цар самукъадаккха дагахьа», - аьлар «Сердало» газетага ГӏалгӀайчен Паччахьалкхен филармоне.
Цу тайпара, республикан къонача бахархошка хьежаш дар корсама гонахьа лелар; екаш йола хоза ашараш, халхараш; фаьлгашка хулаш бола артисташ; цу юкъе дакъа лоацаш шоашца Гӏор-Дади а волаш. Хӏара бер дикача, сийрдача уйлашца чудаха лаьрхӏа дар цигара совгӀаташца. Керда шу - тамашийна ха я, из берашта хьакхолл боккхагӏчар.
