Ший балха боарамал тӏехваьннача хьакима, суд ергья Магасе
Мехкарча паччахьалкхен моттиге кулгал деш хиннача хьакима духьалара гӏулакх тохкаш болх дӏабихьар Магасерча ӏаьдала болхлоша. Балха тӏа лораде дезараш лорадеш воацаш, ший лоӏаме хьовзарах 12 миллион сом совгӏа зе даьд цо.
Из хоам «Сердалога» бир тохкама болхлоша. Цар белгалдечох, 2021-ча шера наджгоанцхой беттагара 2022-ча шера аьтинга беттага кхаччалца, коммерчески моттигаца 12 миллион сом совгӏа долча ахчах 51 машин йохкаш болх дӏабихьаб цо.
Бакъда цох цхьа дакъа - 5 миллион сом ахча мара хьаденна воацача сагага машинаш дӏалуш, каьхата кулг яздаьд цо. Тӏехьагӏо, машинаш кхоалагӏа волча, кхыча сагага ехкай рузкъан гӏулакхех йолча мехкарча министерствон 6 млн зе деш. Из зе меттаоттадайтад цунга.
УФСБ, прокуратуран болхлоша дӏабихьача тохкамах, хьадийллад гӏулакх. Суде чуденнад из дӏахо тахка.
