Магасе хьалаьцар, 10 шу хьалха тийшача балхах, 750 эзар сом лочкъадаьр
Магас-Шахьаре гӀолла йолча Россе МВД даькъа зуламхой лохача болхлоша хьалаьцар Наьсарен кхален Тӏой-Юрта вахархо, из федеральни лехама юкъе вар, 10 шу хьалха тийшача балхах цо дукха ахча лочкъадарах, яхаш, дийцар «Сердало» газетага бокъонаш лораераша.
Полице яхачох, 2015-2016 шерашка, цу сага Магасе вахача цхьан сагагара 750 эзар сом даьккха хиннад. Цо тӀема гӀулакха тӀа хиннача сага санна пенси доаккхаргда, аьнна, Ӏехаваь хиннав из, бакъда ахча хьаийцачул тӀехьагӀа из вайна дӀаваьннав. Цул тӀехьагӀа, цо ший паспорт а шийх дола хоамаш а хийцад, Ӏаьдалах къайлавала дагахьа.
РФ зуламах дола гӀулакх хьадийллар 2022 шера. Дукха лийхачул тӀехьагӀа, из хьалаьцар лоалахарча мехкара. Лоткъам эцаш, цо ше даьчох дехкеваьнна хилар белгалдир, карарча хана тохкама болх дӀахьош ба.
