Сердал телача экранаш тӀа гуш хургда СВО доакъашхой вахарах дола йоазош
«Даьхен лорбой» яхача ганза республикерча филиала болхлоша хьалхадаьккха, МагӀалбикерча хӀама нахалдаккхара оагӀон болхлоша тӀема операце бӀухой сурташ, тӀема никъ сердал телаш долча экранаш тӀа оттадергда. Из хоам «Сердалога» бир ганза болхлоша.
«ТӀема операцена юкъе вахар хаьдача вай мехкахой сурташ, тӀема, вахара никъ шахьара юкъерча экранаш тӀа гуш хургда. Ах минота латташ, тӀаккха кхыдолчунца хувцалуш хургда сурташ», - йоах тхога бенача хоамо. Вахара хьалашка хьожаш вола Коазой Хьамид ва цу балха хьалхаэттар.
«Даьхен гӀулакха арабаьннача къонгашцара лерхӀам ба из. Вай дегаша цӀаккха а бицбе йиш яц къаман сийдола къонгаш, цар деналах, майралах дувца деза кхувш латтача тӀехьенга. Массане дегашта чов хулаш да цар вахар хадар.
Могаш болча низаца, гӀулакхашца цар дезалий оагӀув хьаллоацаш, дӀадаха деза вай», - дийцар тхога «Даьхен лорбой» яхача ганза кулгал деча Оздой Муслима.
