Шейх Мансура цӀерах бола урам, тоабеш латт МагӀалбике
Шахьара моттигаш тоаярах йолча къаман проектага гӀолла Шейх Мансура цӀи лелаю урам тоабеш боахк МагӀалбике. 900 метр бӀеха хиш дӀаухаш йола турбаш Ӏочуехка, кагий кхера тоссаш никъ нийсбеш, боахк болхлой карарча хана. Дукха машинаш, адам лелаш, керттерчарех лоархӀаш ба из урам шахьаре. Бахархошта доккха совгӀат хулаш болх ба дӀахьош латтар.
«Асфальт Ӏобулларгбола, гӀашлой никъ хила беза моттигаш шаьръеш боахк къахьегамхой. ДӀахо, урамера лампаш хувцаш болх дӀахьоргба. Таханарча хано дӀадеххача тайпара шаьра, дика машиний никъ, гӀашлой лела моттиг йолаш, боад эттача сийрда лампаш йоагаш, паргӀата хургья урам тӀа», - дийцар «Сердало» газетага шахьара администраце.
Шахьара моттигаш тоаярах йолча Федеральни, Къаман проекташка гӀолла дӀадихьача хоржамашка, къаьстта цу урама куц тоаде аьнна дехар дир шахьарерча 1700 cага.
