ГӏалгӀайчен МагӀалбике маӀача сага полицега дӀаелар, шийна кхай тӀара кораяь дӏандаргаш
МагӀалбика кхален вахархочо шийна массехк шу хьалха кораяь хинна шиъ дӏандарг, цунцара гӀозарч, эккхаш дола герз, поатрон дӀаелар полице болхлошка, яхаш, дийцар «Сердало» газетага республикан бокъонаш лораераша.
«Россе МВД «Малгобекски» МО ППС бокъонаш лораераш, шоай балха декхар кхоачашдеш МагӀалбик шахьара урамашка гӀолла лелача хана, цхьа саг тӀавера царна, шийна пайда а беш, герз дӀадала безам болаш. Цо полице болхлошка дӀаделар шиъ граната Ф-1, шиъ лаьрххӀа бола гӀоз, лелхаш дола герз, 7.62х39 мм, тӀа маркировка белгало а йоацаш йола йоккха поатрон. Из болх дӀахьош, полицейскешта хайра, ший лоӀам болаш хьаденна герз, пахашка тӀормига чу а доаллаш, цу сага корадаь хилар 2011 шера аьхки кхай тӀара, МагӀалбика кхален СоагӀапчара доахан доажадеш волча хана. Из герз цу сага ший цӀен кхий чу дӀадиллар, ха дӀа мел йода дицделар цун из.
Хӏанз ше кхий чу лостам бе эттача, цунна из юха бӀаргадайра, тӀаккха цо лаьрхӀар Ӏаьдалга цох хоам бе, ше раьза а волаш из дӀадала дагахьа», - йоах ГӏалгӀай Республикан МВД хьабенача хоамо.
Бокъонаш лораераш хьежар, хьаж йоаха жӏали а доладаь; цӀагӀа, доазон тӀа, из вахача моттиге. Ца доагӀаш леладу герз царна цу даькъ тӀа кораданзар.
Герз дӀадахьийтар ГӏалгӀай Республике гӀолла йолча МВД экспертно-криминалистически центре.
Бокъонаш лораераша белгалду, цу сага деррига нийса даь хилар, из унзара герз, цунцара гӀирс полицега хьабалар а, ше уголовни гӀулакхах лоравалар а.
Белгалду, бокъонах лелабе йиш йоаца тӀема гӀирс ше раьза волаш дӀабалар лоархӀаме да зулам дерашта духьалъоттара, цунца цхьана бокъонаш лораяра даькъ тӀа а Ӏалашо е, юкъарлон вахар а лораде таро хургья.
