Магӏалбика Орджоникидзе урам тӏа, керда гӏашлой никъ биллар
Магӏалбика гӏашлой лелача наькъ тӏара хьал техкачул тӏехьагӏа, шахьара администраце балха говзанчашта гуш хилар, Орджоникидзе цӏерагӏча урам тӏарча гӏашлой новкъа йилла плитка еха хилар. Белгалдаьха кхоачамбоацараш сиха юстардаьхар.
«Болхлой сиха болабелар, тӏехьа ца тотташ, къахьега. Цу даькъ тӏа де дезар белгалдаьчул тӏехьагӏа, план оттайир: къаьнара плитка хьалъяьккха, кӏийле кийчйир, юха керда наькъа такилг ӏодиллар. Хьабаьча балха дикал лакха я, дукхача шерашка кхы тоабе ца безаш, хургба из никъ. Хӏанз шахьара бахархой а таро я цӏенача наькъ тӏа гӏолла лела», - аьлар «Сердало» газетага Магӏалбикерча шахьара администраце зарбан болх лелабераша.
Шахьара хьалаш тоадар керттерча декхарех цаӏ да Магӏалбика ӏаьдала. Каст-каста хьалашка хьожаш хиларо, кхоачамбоацараш гучадахаро таро лу шахьара юкъара моттигаш боагӏача боарамах лелае.
