МагӀалбикерча урамашкара лампаш хувцаш латт
05.06.2024 16:38
МагӀалбикерча урамашкара лампаш хувца арабаьннаб болхлой, бахархоша дехарах. Из хоам «Сердалога» бир шахьарерча администраце.
«Шахьара да волча Галай Мусас тӀадиллар, хӀара урамера хьал техке; хувцам эшача моттигашка керда лампаш йохка, аьнна. Арабаьннача болхлоша массехк урам тӀара лампаш кӀезигагӀа ток юаш, дикагӀа сердал лучарца хийцар», - йоах хоамо.
Этуша, Трудовой оалача урамаш тӀа дӀабихьар тахан цу тайпара болх.
Шахьарерча хьакимаша, лакха тӀахьожам лоаттабеш, дӀадахьа лерхӀ из гӀулакх.
