«ТӀема сийлен шахьаре МагӀалбике баьхкабар, дукхача хана денз, тӀем тӀа вейна шоай гаргара саг – цӀеча эскарца хинна салте Хлыстов Фёдор Фёдорович лохаш бола Ульяновскера АкимовгӀар дезал. Из хиннав, Сийлахь-боккхача Даьймехка тӀом лаьттача шерашка, МагӀалбике тӀом беш. Дукхача шерашка лийхаяр Фёдор Фёдоровича гаргарча наха, из дӀавелла воалла моттиг», - йоах хоамо.

Цар дукхаза из хетташ каьхаташ ахийтад тӀема комиссариате, бакъда массаза а жоп цаӀ дар: «Мичав ца ховш, вейнав». Цкъа аьттув баьлар цар. Дагалоаттама кинижка тӀа хоам бар, Хлыстов Ф. Ф. МагӀалбике дӀавелла воалл, аьнна.

АкимовгӀар МагӀалбикерча бӀухой цӀераш тӀайолча дагалоаттама улга юхе из дагавоха а цун сий де а баьхка хилар.

Хьаьшашта гойтар Сийлахь-боккха Даьймехка тӀом лаьтта, советски эскар моастагӀчоа духьаллаьтта моттигаш, иштта тӀема сийлен музее хилар уж. ГӀалгӀай мехка сий ду моастагӀчоа духьаллатташ, вай боккхача мехка кхоане, паргӀато бахьан долаш, шоай синош Ӏодийхкача бӀухой.