«Зарница 2.0» яхача ловзаре котбаьннарий цӀераш яьхар МагӀалбике
23.04.2024 11:47
Ерригача Россе дӀакхухьаш долча «Зарница 2.0» яхача ловзаре котбаьннарий цӀераш хьакхайкайир МагӀалбика кхале. Из хоам «Сердало» газетага бир «Хьалхарчар болам» яхача оагӀон зарбан болх лелабераша.
«Яхьашка котало яьккхар МагӀалбикерча № 16 йолча ишкола «Колиб-р» яха тоаба я, аьнна, хьакхайкадир кхелахоша. МагӀалбика кхален 10 ишкола тоабаш яр яхьашка дакъа лоацаш хиннараш», - белгалдир ерригача Россе «хьалхарчар» моттигерча оагӀон болхло волча Налганаькъан Рамзана.
Укх шера саькура бетта 23-ча дийнахьа, дӀайолайир вай мехка «Зарница 2.0» яха ерригача Россе проект.
