Магӏалбике белгалдир Вӏашагӏтехача Къамий Организаце ди
Магӏалбик-Шахьара №20 йолча ишколе кхетаче дӏайихьар, Халкъашта юкъерча Вӏашагӏтехача Къамий Организаце денна хетаяь. Цу дешара моттига а ерригача шахьара а лаьрххӏа дола цӏай хилар цох. Цига дакъа лоацаш хилар «Цаӏ йола Росси» яхача парте моттигерча даькъа викалаш.
«ООН хьакхеллар тӏемаш юхатоха, сага хургдолча вахара духьа. Тахан лоархӏаме да, машара мах кагирхошта ховш хилар, къамашта юкъера лерхӏам цар лелабар. Цу тайпарча кхетаченаша новкъостал ду бехктокхаме дола ноахал хьалкхеде, граждански цхьоагӏо йолаш из хилийта», - аьлар «Сердало» газетага «Цаӏ йолча Россе» моттигерча даькъа секретара Йовлой ӏусмана.
Дешархоша боккхача безамца тӏаийцар из кхетаче, цар а дар халкъашта юкъерча бувзамца, къамашта юкъера барт, цхьоагӏо лелаярца дувзаденна хаттараш. Из болх вӏашагӏбеллараш хьежар, кхувш йоагӏача тӏехьенна дӏагойта, тахан латташ дола доккхий хаттараш кхоачашдара дерригача мехкашкара низ вӏашагӏтоха безилга.
