Барзкъаш лочкъадаь кхалсаг лохаш ба, МагӀалбикера полице болхлой
20.05.2024 11:02
Тийшача балхаца кердача барзкъех ший шкаф хьалйиза лаьрхӀа яхархо я, МагӀалбикерча полице болхлоша лохаш.
Шахьарерча «Изобилие» яхача базар тӀарча тика чу латтача кхалсагагара 24 эзар сомах шийна кочамаш ийцай цо, ахча дӀалургдолаш. Ахча дӀадала деза ха хьатӀаэттача, тикан дас телефон дӀатехача, из номер болх беш хиннаяц. Оапаш бийца, шортта барзкъаш ийцар яйна дӀаяьннай.
«РФ УК 159 статьяна чудоагӀаш да оапаш бийцачо вӀашагӀделла зулам. Полице болхлой из лохаш бола болх дӀахьош ба тахан», - хоам бир «Сердалога» МВД викалаша. Тийшаболх хинна тикан да, ший ахча доаллар кораярга сатувсаш, хьежаш я.
