МагӀалбикерча тикашта юхера доазонаш нувхех хьалдизад
МагӀалбике дӀахьош ба мах бара болх, из каст-каста белгала а хул. Промышленни оалача урам тӀа мах беш латтараша шоай тайпара кхоачашду хӀама ехка совъяьннача нувхашцара гӀулакх, шоашта аттагӀа йолча тайпара, кхы гаьна а ца болхаш, дӀайоах цар уж. Цудухьа шоаш латташ йола моттигаш нувхех хьалйизай цар.
«Законо дӀадехачох, беррига, шоай доалахьара хӀама леладераш, моттигерча операторца барт баь хила беза, цар ханнахьа нувхаш дӀакхухьаргйолаш.
Цхьабакъда цхьабараша, леладеш дола экологен закон ца ховш санна, шоашта хетар хьаду. Цар шоай совъяьнна нувхаш кхыча беса лелаю - цун чаккхе я вайна дукхагӀа дагайоаллар.
Мах дӀа ца балар духьа, цу тайпарча наха тайп-тайпара ко догӀ цу гӀулакха. Масала, царех цхьабараш, вӀаштӀардаьча цӀеношка бахача нахá тӀачӀоагӀъяьча нувхаш чукхувсача яьшкаш чу товс шоай нувхаш, цу тайпара уж каст-каста хьалъюзаш хиларах нах раьза хилац, цул совгӀа уж йохаш а моттигаш хул», - аьлар МагӀалбик-Шахьара администраце.
