Бокъо йоацача моттигашка нувхаш Ӏокхувсар даржаш латт МагӀалбике
Ӏалама гӀулакхех, экологех йолча министерствон болхлой, сатем байна кхесташ ба карарча хана. ДогӀан тӀехьа ураотташ дола жӀаленускалаш санна, кхаьч-кхаьчача нувхий гувнаш даржаш латт МагӀалбике. Укх наькъа иштта моттиг гучаяьлар Махьмад-ХитӀе - Моздаке яхача наькъа юхе. Из хоам «Сердалога» бир министерствон болхлоша.
«Ӏаьдала бокъонга диллача, из хӀама доаржадаьраш бехктокхаме оза бокъо яц Ӏалама гӀулакхех йолча министерствон. Оаха хоам баьб прокуратурага, цар боаггӀаш бола болх дӀахьоргба цу гӀулакха тӀахьожам лоаттабе безарашца», - дийцар министерствон болхлоша тха газетага.
Кхаьч-кхаьчача йоаржаеш йолча нувхаша доккха зе ду Ӏалама, экологена, бӀехду фо. Даггара кхайкарал дича а, из дӀаэца ловш боацача МагӀалбикерча хӀама бе доацача бахархоша тахан сатем боабаьб массане.
