Даьхен лорбой Денна хетаяь кхетаче дӀайихьар МагӀалбике
24.02.2025 12:04
«Сийле» яхача МагӀалбикерча мемориале дӀайихьар Даьхе лораеш лаьттарий денала хетаяь кхетаче. Из хоам «Сердалога» бир шахьара мэре болхлоша.
«Цига дакъа лоацаш бар вай мехкада Келаматанаькъан Махьмуд-Ӏаьла, республикерча Паччахьалкхен хьалха латта Сластенин Владимир, Ӏаьдала болхлой, тӀема операце доакъашхой, тайп-тайпарча министерствай кулгалхой, администрацей кулгалхой, кадеташ, къона эскархой, «Хьалхарчар болам» яхача оагӀон доакъашхой, иштта шахьара бахархой», - йоах тхога бенача хоамо.
Даим йоагача цӀера юхе зизаш даьхка, Даьхен гӀулакха латташ байнараш дагалаьцар цига.
