Магӏалбике болам дӏабихьар, дакха гаьнаш дӏайогӏаш
Магӏалбика шин даькъ тӏа гаьнаш дӏаювш хилар, ӏаламца бувзабенна болам дӏахьош.
Серго цӏерагӏча культуран, салоӏама парке дӏаегӏар 30 къона дакха га, тӏайоагӏача хана царех парка хозал хургья. Цунца цхьана доазув баьццара деш болх дӏабихьар №7 йолча «Фаьлг» яхача берий беша даькъ тӏа, цига дӏаегӏар кхы а 20 га. Шахьара зӏамигача бахархой таро хургья кастлуш из хозал го.
Из болам дӏабахьа дагадехараш бар «Сибрегӏен могашал» яхача компане викалаш, из болх вӏашагӏбелла а ца ӏеш, цар цу юкъебаьхар шахьара бахархой»,- аьлар «Сердало» газетага Магӏалбика шахьара администраце зарбан болх лелабераша.
Магӏалбика бахархой лоархӏамеча гӏулакхех цаӏ да, гонахьара ӏалам лорадар; хӏаьта бизнеса, юкъарлоно цхьана къахьегаро таро лу шахьар тоае, хозъе. Гаьнаш дӏайогӏар - из духхьал лостам бар дац, из да шахьара хургдолчун юкъе шийгара дакъа лоацаш хилар. Хӏара дӏаегӏа га - цӏенача феца доаккха са, ахкан замах дола ӏи, хозала оагӏув, дукхача шерашка бахархой гӏадбугаш хургйола.
