МагӀалбике белхий бир Тирка дукъ тӀа
МагӀалбик-Шахьара «Лостам» яхача МКУ болхлоша боккха белхий бир хозача моттиге, Тирка дукъ тӀарча дагалоаттама комплекса доазон тӀа. Из кхетаче дӀаяхьара бахьан дар дагалоаттама моттигашка лостам бар, уж вай республикан а шахьара а лоархӀаме хилар ларде а лоацаш.
Керттера терко тӀаяхийтар буц дӏахьакхара. Из болх дӀабахьарах, доазув ший тайпара хоза а цӀена а дийрзар.
Хоза кулг теха, лостам баь сийленгаш латтар - из вай турпалхой сийдеш хилар да, Даьхе бахьан долаш шоай синош дӀаденнача бӀухой. Из иштта дика масал да вай кхувш йоагӀача тӀехьенна луш дола. Цу тайпарча моттигашка бахарах доаккхал ду цар; шоай истори, даьй сий лорадеш.
Каст-каста цига тӀаяьнна буц дӏахьекхар, сийленгаш бӀарчча хилийтар, уж лорадар лоархӀаме да.
МагӀалбика администраце тӀахьех шахьара бахархой цу тайпара гӀулакхаш дӀадахьара, дагалоаттама моттигаш лораяра. Дӏаяхача ханах бола дагалоаттам лорабар - из юкъара гIулакх да хӀара сага.
