МагӀалбике, къаман проекта чудоагӀаш, тоадир юкъара доазонаш
2019 шера денз, «Шахьара вахара хьалаш» яхача хӀанз «Вахара таронаш» оалаш йолча къаман проекта чудоагӀаш, МагӀалбик -Шахьаре дика тоадаь йистедаьккхар юкъара 32, коашкара 17 доазув, яхаш, дийцар «Сердало» газетага шахьара администраце.
«ХӀанз коашкара доазонаш дика тоадаьд берий майдашца, салаӀара йолча моттигашца, плитка Ӏойиллай, Ӏоховшара гӀандаш оттадаьд, нувхаш чутувса яьшкаш а латт. Юкъарча доазонашка сердалонца Ӏалашо яьй, иштта асфальтобетонах оаса а бахийта, наькъа такилгаш даьд», - аьлар хоамо.
Белгалду, бекарга бетта 21-ча дийнахьа денз, дӀахьош я Ерригроссийски кхадж тассара ха, цига хьахержа доазонаш тоадергда 2026-ча шера. Наха аттагӀа хургдолаш, МагӀалбика -Шахьара берий-технически кхоллама Центре вӀашагӀъеллай волонтерий штаб.
