Магӏалбикерча № 16 йолча ишколе, дешархой зуламах лорабеш кхетаче хилар
Терроризм, экстремизм яхача доккхача зуламашта духьалара кхетаче дӏаяхьа гулбелар Магӏалбикерча № 16 йолча ишколе. Шахьарерча администраце болхлой, дийша нах, иштта кхыбараш бар дешархошца къамаьл дӏахьош хиннараш.
«Из бӏеха зулам доаржаде гӏертарашта эггара аттагӏа хетараш ба хӏетта кхийнараш, кхувш латта кагирхой. Царга гӏолла доаржаде хьож уж из хӏама. Цунга хьежжа, къонача тӏехьенца из дувцаш кхетачеш дӏакхахьар, цу бӏехача зуламо наьха ираз доаделга, вахара никъ хоадабелга хьалхадоахаш, кхетаченаш дӏакхахьар лоархӏаме да тахан», - дийцар «Сердалога» цу моттигера.
Ишкола администраце доккха баркал аьлар дийшача наха, мэре болхлошта, шоашца бувзам лелабарах. Цӏагӏа, дешара моттигашка, массанахьа хьалхадаха деза вай къонача тӏехьенна зуламах лораяла езилга, тешаме боацача нахаца цӏаккха а оагӏув лаца йиш йоацилга, вай дино цхьаккха тайпара зулам леладе бокъо ца лулга!
