«Таханарча дийнахьа МагӀалбика кхален диспансерни учёте латтараш 194 саг ва, профилактически учёте - 16 саг. Укх шерарча хьалхарча кхаь бетта учётера дӀаваьккхав ши саг, керда саг дӀаоттаваьвац. Наркотикашца бувзам лелаберий таханара юкъера ха 33 шергара 30 шерга Ӏолохъеннай. Ер шу доладелча денз, наркотик яха дохьаж дохкаш йола ши моттиг гучаяьннай. Лирик, тропикамид яха наркотически лоархӀаш йоаца, дегӀа зе деш йола хӀамаш йохкаш моттигаш хоаеннаяц.

КоАП гӀулакхех Ӏаьдало бехктокхаме эзав 20 саг», - дийцар «Сердалога» МагӀалбика кхален администраце кулгалхочун гӀонча волча Хамхой Ӏалихана. Наркотикашта духьала къовсам лоаттабеча комиссе доакъашхоша дийцар, цу гӀулакха ца хаддаш тӀахьожам лоаттабе безилга. Цу гӀулакха лаьрхӀа бӀарчча программа я шахьаре вӀашагӀъелла дӀахьош. 2026-ча шерга кхаччалца дӀаяхьа езаш я из программа.

Шахьаре, юрташка дӀакхухьача кхетаченашка бахархошца дувц наркомани яха доккха зулам юхатохарах, цун деррига наькъаш дехкарах, цу дохьажаца бувзам лелабераш гучабоахаш бола болх дӀакхахьарах.