Физкультурника Ди дездир МагӀалбика кхале
Физкультурника Денна хетаяь кхетаче дӀайихьар Йоккхача Ачалкхе. Бокъонца дола цӀай дар цигарча ФОКе бӀарчча дийнахьа лаьттар. Тайп-тайпарча оагӀонашцара шоай говзал гойташ бар цига спортсменаш, хӀаьта из деррига теркалдеш латтараш тӀоараш деттарца цар дегаш ураоттадеш бар. Яхьашта тӀахьожам беш бар тренераши спорта оагӀонцара кхелахойи.
«Программан юкъе яр кулгаш гӀортадарах, жӀакех йола яхьаш. Кулгаш гӀортадарах йолча яхье дакъа лоацараш 50 саг вар. Хьалхара моттиг яьккхар ЦӀечой Исраила, шоллагӀча моттиге Ӏоахарганаькъан Расул хилар, кхоалагӀа моттиг ГӀогӀенаькъан Мухьмада кхаьчар.
ЖӀакех йолча яхьашка хьалхарча моттиге Кхузанаькъан Идрис эттар, шоллагӀа моттиг БӀазенаькъан Заьлмаха кхаьчар, кхоалагӀа моттиг Аькхенаькъан Джабраила елар», - дийцар «Сердалога» МагӀалбика кхален администраце.
Котбаьннарашта совгӀаташ луш, чакхъяьлар яхьаш. ТолашагӀа бола спортсменаш белгалбир кубкашца, майдилгашца, грамоташца, иштта ахчан совгӀаташ даларца.
Цу яхьо хьагойтар, спорто дукха адам гаргаозилга, наха юкъера безам совбоаккхилга.
