МагӀалбика кхале дездир российски студента Ди
Даби-Юртарча культуран цӀагӀа российски студенчества Ди хилара хетаяь кхетаче дӀайихьар. Из дӀахьош яр МагӀалбика кхален Культурно-салоӀама центре, цар кийчйир дешархошта лаьрхӀа дика программа.
«Цӏай дездеш, керттера хилар брейн-ринг кепара дӀахьош хинна хьаькъале ловзар. Яхьашка яьлар Къилбаседа Кавказа боахамашта юкъера колледж, иштта Къилбаседа Кавказа Чуранаькъан Т.Х. цӀерагӀа доагора- энергетически колледж. Студенташа гойтар шоаш кхеташ хиларал совгӀа, тоабашца цхьана, сиха уйла е ховш хилар.
Тоабаша, аргӀ-аргӀагӀа котало шоашкахьа йоаккхар, хӀаьта цига оттадаь хинна хаттараш ший тайпара хила везаш вӀашагӀдехка дар. Юххера а, брейн-рингах боккъонцахьа бола хьаькъала къовсам хилар, студенташта ховш дар гучадоаккхаш», - аьлар «Сердало» газетага из цӀай вӀашагӀделлараша.
Хьаькъале яхьаш дӀаяхьарал совгӀа, сийрда концертни программа а хилар. Культуран - салоӀама центра викалаша гойтар тайп-тайпара кхоллама номераш, цу юкъегӀолла луш совгӀаташ а дар, дикагӀа болча студенташта - грамоташ.
МагӀалбике дӀайихьача кхетачено дика гойтар студенчество - из хьаькъал совдаккхара бахьан хиларал совгӀа, кхоллама таронаш хьаеллаш йола оагӀув хилар.
