АТК кхетаче дIайихьар, МагIалбика кхале
Терроризма духьале еча комиссе кхетаче дIайихьар МагIалбикерча администраце. Цига дийцар тахан вай кагирхошца, уж харцача наькъах лорабеш, бе безача балхах, кхален чуйоагIа моттигаш цIаьхха хила тарлуча хатара духьала кийча лоаттаярах, иштта дола хIама нийсделча, катехха ураотта берригаш кийча хила безарах.
«Терроризма духьале лоаттаеча комиссе дIайихьача кхетаче дийцар, арахьара хьачубаьхка вай мехка бахача наьха хьалах.
Полице болхлочо белгалдир, уж бахача моттигашта Iаьдало массахана тIахьожам лоаттабелга. Арахьара хьачувенача хIара сагага патент да, Iаьдало оттаяьча бокъонех дIахьош ба уж шоай болх», - дийцар «Сердало» газетага администраце зарбан болх лелабераша.
МагIалбика кхаленна чуйоагIаш йолча моттигий администрацей кулгалхоша, кагирхой харцача наькъах лорабеш, шоаш дIахьоча балхах йола докладаш йийшар цига.
