Амбулаторешкарча балхага хьожаш, хилар МагIалбика кхале
МагIалбика кхаленна чуйолхаш йолча юрташкарча: Кхаь Ачалкхенашка, Кердача Редантерча, Заьзгакъонгий-Юртарча - амбулаторешкара болх малагIча боараме дIахьош ба тахка арабаьлар юкъарлен унахцIенони тIахьожамахи йолча республикерча моттига болхлой, унахцIенон гIулакхех йолча Министерствон керттерча неврологаца. Из хоам «Сердалога» бир министерствон болхлоша.
Унахошта ха дезаш дола хIамаш царна дIадовзийтара болх мишта дIабода хьежар кхелахой, иштта лазарашта духьала маьхий тохара гIулакх мишта дIадода техкар.
«Къаьстта йоккха терко йир цIийоацар яха хала лазар хIетта хьакхийттача хана гучадаккхара тIехьа болх дIакхахьара, халача лазараша лаьцача унахошта тIахьожам лоаттабара; каьхаташцара, унахой карташцара болх малагIча боараме дIахьош ба техкар.
Кхелахошта юкъе хиннараша хьалхадаьккхар, лазараш гучадоахаш бола болх хан-ханнахьа дIакхахьа безилга, иштта дегIацара дIа ца къасташ лазар долча унахошта массахана тIахьожам лоаттабе безилга», - дийцар «Сердало» газетага министерствос.
