Урамех техка цӏераш шозза ца хилийта гӏерт Магӏалбике
27.11.2025 09:34
Кхален администрацена кулгал деча Къоастой ӏаддал-Хьамида вӏашагӏъелла кхетаче хилар Магӏалбике. Цига дийцар шахьара урамий цӏераш нийсъеш болх дӏабахьарах.
«Къаьстта йоккха терко тӏайохийташ дийцар хаттар-жоп долаш телевидене гӏолла Мехкадаьца хиннача кхетаче Йоккхача Ачалкхера вахархо леткъа хиларах, цхьан юрта цхьа цӏи лелаеш кхо урам ба, аьнна. Из хӏама меттадоаладеш болх дӏабахьа безилга белгалдир кхален моттигашка. Белггала оттаяьча хана, беррига болх чакхбаьккха хила безилга тӏатехар хьакима», - дийцар «Сердалога» кхален администраце.
Хӏара юртарча администраце кулгалхошта тӏадиллар, цхьатарра цӏераш лелаеш долча урамий хьал бахархошта, хьаьшашта аттагӏа хургдолаш меттадоаладе, аьнна.
