Шаьме дӏабахарий гаргарча нахаца къамаьл дир Магӏалбика кхале
Сирийски ӏарбий Республике (Шаьме) дӏабахарий гаргарча нахаца къамаьл дир Магӏалбика кхале. Терроризм, экстремизм яхача зулама духьала лоаттабеча балха тӏагӏолла чакхдоаккхаш гӏулакх дар из.
«Кхетаче дакъа лоацаш бар терроризма духьала къовсам лоаттабеча кхела хьалха латта Джамболатанаькъан Мухьмад, цу оагӏонцара керттера болхло Цӏечой Руслан, администраце кулгалхочун гӏонча. Кхетаче дийцар цу бӏехача зулама никъ ходабеш кхоачашде дезарех, цу юкъебахарашта хургдолча таӏазарах, иштта цар гаргарча наха тӏалаттача кхерамах.
Къаьстта йоккха терко тӏайохийташ дийцар из зулам даржаш дола наькъаш дехкарах, кагирхой лорабарах, массахана тӏахьожам лоаттабе безаш хиларах», - дийцар «Сердалога» Магӏалбика кхален администраце.
Терроризма духьале лоаттаеча кхело белгалдир, цу кхетачен керттера декхар гӏо дар, оагӏув хьаллацар долга. Моллагӏа цу оагӏонцара хало тӏакхаьчача, е кхерам тӏалатташ хӏама хилча из хьаоалаш, гӏо дехаш хилара тӏахьийхар цар Шаьме дӏабахарий гаргара нах. Иштта йола кхетаченаш каст-каста дӏакхухьаш я цу моттиге.
