МагӀалбика кхале дӀахьоргба «Танка» сийленга тӀара болх
Дӏа-юха ухаш ю кхетаче дӀахьош, МагӀалбика кхален кулгалхо Къоастой Ӏаддал-Хьамид керте а волаш, дийцар «Танка» сийленг тоадарах. Из латт СоагӀапча Ӏочуоттача. Цига дакъа лоацаш вар юрта администраце кулгалхочун декхараш кхоачашдеш вола Галай Хамбор, юрта а кхален а Iаьдала болхлой, аьлар «Сердало» газетага кхален даькъ тIа.
Керттера дийца дош дар сийленга хьал, из тоаде дезар. Гулбеннараша лаьрхӀар; цигара буц дӀахьакха а, из доазув цӀенде а, сийленга, карта басар хьакха, иштта гонахьа сердал луш йола лампаш ӀойогӀа еза, аьнна.
«Деррига балхаш йистедаха деза маьтсела бетта 9-гӀа Коталон ди хьатӀадоагӀаш, мехка тайп-тайпарча моттигашкара викалаш боагӀаргба», - аьлар кхален кулгалхочо. «Танка» сийленго белагалду, Сийлахь - боккха Даьймехка тӀом латтача хана, советски салташа гойта денал, цар майрал, цудухьа из тоадар лоархӀаме да.
