ГӀалгӀай паччахьалкхен 100 шу дизара хетабаь гойтам хьабийллар МГД
Вай паччахьалкхен 100 шу дизара хетабаь гойтам хьабийллар, Москва-Шахьара думе. Вай къаман цӀихезача суртанчий Бештой Вахий, Куштанаькъан Эльмирай балхаш оттадаьд цига хьокха. Из хоам «Сердалога» бир Москверча массазарча вай викалаша. «Цхьана кхеллача укх лоархӀамеча проекто лакха начӀал долча нахах йизза йолча ГӀалгӀай республикаца дӀахо а тӀатеӀӀа бувзам лелабе никъ хьабелларгба аьнна хет сона», - аьлар МГД депутат волча Янданаькъан Мухьмада, гойтам хьабеллаш.
«Тамашийна хоза кхелла, республикера хозаленаш гойташ дола балхаш дар хьокха оттадаь. Царга хьежача, чӀоагӀа догьэттар са цу моттигашка ваха а хьажа а; цигара Ӏалам, культура йовза», - аьлар гӀишлон балхах, моттига доал дарах йолча МГД комиссен кулгал деча Козлов Александра.
«Кхоллама оагӀон балхаш массахана лакха лоархӀаш, наха дуккхадараш довзийташ, гучадоахаш хиннад. Куштанаькъан Эльмирай, Бештой Вахий сурташ дегашта боча йолча республикаца дувзаденна да», - белгалдир ший къамаьла юкъе ГӀалгӀайчен массазарча викала гӀонча йолча Ростова Дианас. Укх бетта 27-ча денга кхаччалца; хургба вай мехкара хозал, культура, начӀал дола нах бовзийта гойтам.
