Культуран гӀулакхех йолча Министерстве, йоккха кхетаче дӀахьоргья
20.05.2024 11:27
ХьатӀадоагӀача пӀаьраска дийнахьа, йоккха кхетаче дӀаяхьа лерхӀ культуран гӀулакхех йолча Министерстве. Цунна хьалха латтача Лаьнанаькъан Залинас кулгал деш, дӀахьоргдолча вӀашагӀкхетаре дувцаргда дӀадахача шера кхоачашдаьча декхарех, иштта укх шера дӀабахьа безача балхах.
«2023-ча шера театрально-концертни программаш дӀахьош, библиотекашка, дешара моттигашка дӀабихьача балхах, 2024-ча шера кхоачашде дезарех дувцаргда кулгалхочун гӀонча йолча Куртой Маккас, музеяшка, культуран оагӀон моттигашка кхоачашдаьрех, де дезаш хьалхашка латтарех дувцаргда кулгалхочун гӀонча волаш къахьегача Малсаганаькъан Хьажбикара», - хоам бир «Сердалога» культуран гӀулакхех йолча Министерствера.
