ГӀалгӀайчен Ӏалама Министерстве кийчлуш ба, боккха экоболам дӀабахьа
26.09.2025 11:45
Республикан Ӏалама тароний, экологе Министерствон болхлой кийчлуш ба кхоана боккха экологически болам дӀабахьа. «Россе хий» яха, «Экологически дика хьалаш» яхача къаман проекта чуйоагӀаш, из хетаяьй Шолжа хин Денна.
Цунца дувзаденна министра Мизенаькъан Микаила укх деношка кхетаче дӀайихьар ший гӀончашца, иштта отделий кулгалхошца, цига дийцар болам дӀабахьарах лаьца.
Из дӀаболалу кхоана, тов бетта 27-ча дийнахьа, 10 сахьат даьлча Шолжа кхален ГӀажарий-Юрта Эса яхача хин йистера.
«ГӀалгӀай Республикан Ӏалама Министерствон болхлой Ӏуйррехь а цу моттиге хургба, из болх вӀашагӀбелла а ца Ӏеш, цар шоаш а дакъа лоацаргда лостам беча юкъе»,-аьлар Ӏалам лорадеча боахаме.
