Ахархоша дийцар, «Фермерий ишкол» яхача проекте дакъа лацарах
«Фермерий ишкол» яха проект дӀахьош я. Цу ларда тӀа кхетам лу ладувгӀарашта мехка дикагӀа йолча ахархой вузаша. Цу проекте дакъа лаца ловраш, мах бала ца безаш, таро йолаш ба ахархой бизнес лелаяра говзал Ӏомае. Вай республика хӀанз шоллагӀа шу да цу проекте йола.
Укх деношка республикан юртбоахама Министерстве дийцар «Фермерий ишколо» луча пайдах. Цига кхетаче дӀахьош вар министр Гаьгенаькъан Мухьмад, тӀехьара тӀа йолча ГӀалгӀай Республикан «Россельхозбанка» АО офиса кулгалхо Курскенаькъан Рустам, яхаш, дийцар «Сердало» газетага ГӀалгӀай республикан юртбоахама Министерствон зарбанболх лелабераша.
Цул совгӀа, шин оагӀоно дийцар ахархой боахамо, гӀалгӀай Россельхозбанка филиалаца бувзам лелабарах, царна юкъе ахчанца а кхыдолча хьалаца а новкъостал лоаттадеш хиларах, юртбоахама даькъ тӀа къахьегаш болча наха.
Курскенаькъан Рустама яхачох, банко моттигера фермераш хьаллоацаргба, иштта гӀо дергда дӀаболалуш болча шоай доалахьара хӀама хьадийллача наха.
«Из болх дӀахьоча юкъа банк хьалхале лелаерех хилар ахархой даькъ тӀа деча новкъосталах. Цун хьалаш леладу хӀара денна дукхача фермераша, юртбоахамашца дувзаденна балхаш леладераша. ДӀахо а иштта аьттув хилба цар шоайла бувзам лелабе», - аьлар Гаьгенаькъан Мухьмада.
