Россе юртбоахама Министерстве белгалбир, Курскенаькъан Рустама балха толам
Вай мехкахочунна, Курскенаькъан Мухарбика Рустама, дукхача шерашка дика толамаш доахаш, юртбоахама даькъ тӀа къахьегаш хиларах; баркал оалаш дола каьхат делар Россе юртбоахама министра Д. Н. Патрушевс кулг а яздаь, яхаш, дийцар «Сердало» газетага юртбоахамхоша.
«Мухарбика Рустама къахьег Москва-Шахьара «Российски Юртбоахама банко» наха деш дола гӀулакхаш чакхдахара Департамента бувзамаш дегӀадоаладара, кхоачашдара йолча моттига цхьан даькъа болх лелабу директор волаш», - аьлар хоамо.
ХьалхагӀа Курскенаькъан Рустам, 23.04.2014-17.07.2016 шерашка болх беш вар №3349/42/ 03 йолча МагӀалбика шахьара ОАО «Россельхозбанке».
2020 шера, маьцхали бетта 20-ча дийнахьа денз, из болх беш ва Москве, цо тӀахьожам лоаттабу моттигашкара филиалашка алапе проекташ, мах бара оагӀонаш дегӀайоалаяра, банковски карташ леладара хьалаш тоадара, балха моттигаш дегӀайоагӀаш хилара.
Цу тайпара болх дикача толамашца дӀабахьа ховш вай мехкахо хиларах, доаккхал де деза, моллагӀчунна а ше деш дола гӀулакх тоаде догдоагӀаргдолаш масал да из.
Тахан Россе дукхача моттигашка, шоашта тӀадилла декхар дизза кхоачашдеш, цунца бехктокхаме болаш, дукха ГӀалгӀайчен викалаш ба. Цар республикан цӀи лакха лоаттаю, иштта Российски паччахьалкхе социально-экономически дегӀаяра юкъе доккха дакъа лоац.
