ГӀалгӀайчен спорта министерстве безбир массехк латар чулоацача спорта (грепплинга) викалаш
Спорта министерстве белгалбаьхар дӀадодача шера ерригроссийски а дунен халкъашта юкъерча а яхьашка дикача оагӀорахьара шоаш хьагойта бола массехк латар чулоацача спорта викалаш (грепплераш). Из хоам «Сердало» газетага бир из моттиг дӀайихьараша.
«Министерствон кулгалхочо Белхарой Руслана, сийлен грамоташ луш, даькъалабийцар латархой а цар хьехамчаш а. Ювцаш йола спорт дегӀакхувларах, шоашта ховр кхы а кӀоаргде гӀертарах, шоаш караийцача гӀулакха тешаме хиларах берригача доакъашхошта ахчан совгӀаташ дир», - яхаш, дийцар газетага.
Грепплинг йоаржаярах бехктокхаме хиннача цу спорта федераце вице-президента Хазанаькъан Назира хьинаре къахьийга хилар белгалдаьккхар министра. Цунна елар «ГӀалгӀай паччахьалкхен 100 шу дизар» яха майдилг. Иштта хоаставир латарах вола керттера хьехамча, дукха ха йоацаш дунен чемпионата совгӀат шозлагӀа даьккха Хьоашаланаькъан Илез.
«ДӀадода шу аьттув болаш хилар, дукха майдилгаш яхарца. Цо хьагойт спортсменаш боаггӀача боараме кийчбаь хилар, хьехамчий болх лерттӀа дӀаоттабаь а дӀахьош а хилар. Берригаш даькъалабувц цу толамашца, теша безам ба дӀахо а кердача коталонашца оаш дикахетараш дергхиларах», - аьлар Белхарой Руслана.
