ГӏалгӀайчен МКЖР хьабийллар «ЖожагӀатера оаз» яха гойтам
ГӏалгӀай къам мехкахдаккхара дагалоаттама Мемориала моттиге хьабийллар гӀайлгӀай поэта, йоазонхочун, журналиста Чахкенаькъан Тӏегала Ювсапа хетабаь гойтам. Цо тӀахьех лорабара, тӀехьенна дӏабалара къаман Ӏазап лайнача, цун халонех чакхваьннача денал долча сагах бола дагалоаттам. Документальни кадрашка, архивни материалашка, мультимедийни гӀирсашка гӀолла гойтамо хьаделл гулбеннарашта хьалхашка цу сага вахар, къизача ханашка цо лайна халонаш.
«Керттера моттиг дӀалоацаш я «ЖожагӀатен оаз» яха Чахкенаькъан Ювсапа повесть. Из духхьал повесть хинна Ӏац, цунга гӀолла вайна хозаргда Сталина бӀехача гӀозаро вай къаманна тӏаденача Ӏазапах, СССР миллионаш бола нах цар хӏалакбарах», - аьлар «Сердало» газетага гойтам вӀашагӀбеллараша.
Чахкенаькъан Ювсапа вахар саг ца тешшал чӀоагӀача денала масал да. ГУЛАГА ворхӀ набахтенах чакхваьннав из, цу юкъегӀолла ткъаь кхозза этапах вугаш.
Цу халонашка хьежжа доацаш, ший кхоллама болх цо соцабанзар. Цун литературни тӀехьале - жожагӀатера оаз я, вай тӏехьенга шоаш лайнар дувца йиш йоацаш бисарий оаз я из.
