Мехках бохабаьча наьха мемориала, наIараш йийлла Ди да
1992-ча шера ардара бетта 30 дийнахьа эттача хатара юкъе байнараш дагалоацаш дола ди да вай мехка. Цунга хьежжа, укх бетта 30-гIа ди мехках бохабаьча наьха Мемориала наIараш хьайийлла Ди да. Цу дийнахьа музея наIараш, берригаш тIаэцаш, шерра йийлла латт.
«Мехкахой, вайцига хьабаьхка хьаьший мах боацаш музее баха, цу дийнахьа эттача туржаIах дар ма дарра довза йиш йолаш ба. Къаман исторе Iаьржа, дег чу цIаккха а тоаенна дIагIоргйоаца чов хинна латташ дола ди да из. Кхувш латтарашта а довза деза шоай къаман истори, из тайпара харцо кхы ца оттийта духьаллаттаргболаш», - дийцар «Сердалога» музея болхлоша.
ХIара шера гуйран, из ди вай дегашта хало яхьаш доагIа. Тахан вай дагалоац, цхьаккха бехк боацаш, бIехача наьха кулгех бейнараш. Ше мел Iоадаьр дуташ, вахарах, цIенах деха, арадала дезача оттадир дукха адам. Пригородни кхале этта из доккха хатар вай массане дегашта дицлургдоацарех да!
Тахан вай дагалоац 1992-ча шера бахачара бохабаьраш санна, иштта цхьаккха бехк боацаш мехкахбаьха, Даьхенах хьегаш дола дегаш халчаувттадеш Iазапе хиннараш, шоай доалахьа мел хиннача хIамах баьнна лийнараш. Кхы цIаккха а ма гулда вайна цу тайпара денош!
