МКЖР дувцаргда, ширача гӀалгӀаша мишта дездеш хиннад керда шу
ГӏалгӀай къам мехкахдаккхара дагалоаттама мемориал оалача моттиге болх беш ба «ГӏалгӀай керда шу. Цӏайна истори» яха видеогойтам, цига бех бӏаьшерашка бодача тамашийнача наькъа. Гойтамо хьаделл гӀалгӀай къаман кердача шера Ӏадатий хьасташ, мишта дездеш хиннад керттера Ӏан цӀай дӀаяхача заман чухь баьхача вай даьша.
«Гойтаме тайп-тайпара хӏамаш я, цар дувц Ӏан замах, иштта Кавказа тайп-тайпара къамаша Кердача шера цӀай дездеш хиларах. Цига вахачун иштта го таро я ханорга керда шу хьахилар вай дӀабахача даьша мишта тӀаэцаш хиннад, кхы дукха хӀама ха йиш я цига, цу цӀайца дувзаденна къаман Ӏадаташ, оамалаш йовза йиш я. Гойтама керттердар да сурташ, Ӏилман каьхаташ-йоазош, иштта СМИ материалаш» , - аьлар «Сердало» газетага из кхетаче вӀашагӀъеллараша.
Кавказа къамаша санна, гӀалгӀай къамо а ханорга цӀай дувзадеш хиннад Ӏалама хьалашца, вахара гӀулакхашца. Хӏанзара Керда шу культуран юкъедаьнна дукха ха яц, гӀалгӀай къаман дӀаяхача замах баьхача наьха шоай хиннай Ӏан кхетаченаш, царца белгалдеш хиннад Ӏалам кердадалар, иштта сатувсаш хиннад хьатӀадоагӀа керда шу дика хьувкъам болаш хиларга.
