Республикера хин хьал тоаде арабаьннаб болхлой
04.06.2024 09:54
Шахьарашкара, юрташкара тишъенна турбаш дӀайоахаш, кердаяраш чуйоахкаш, къахьегаш ба республике. Укх наькъа Южни оалача юрта дӀахьош латт из лоархӀаме болх. «Сердалога» из хоам бир МагӀалбикерча администраце.
«Юрташкара вахара хьал тоадара тӀехьа йоаржаяь программаш я, МагӀалбике дӀахьош. Цу программашка гӀолла тоаеш латт Южнера хин чудилла моттиг. Из болх кхоачашбе, аьнна, тӀадиллар юртбоахама гӀулакхех йола министерство я», - йоах тхога бенача хоамо.11 км латта хин турбаш я тоаеш латтараш. Южнерча дерригача урамашкара хьал тоадергда цу гӀулакхо.
Цигарча бахархошта доккха совгӀат хургда, даиман ахкан хана хьовзам болаш хинна хин хьал тоадаларах.
